கனவான கனவு

 

கல்வியும் பயில

அறிவும் வளர்க்க

பண்பும் சிறக்க

கல்லாமை விலக

அறியாமை நீங்க

பரம்பரை மடமை

நோயும் அகன்றிட

உயிரும் மெய்யும்

எழுதிட ஆசை

பள்ளி சென்று

பயின்று வர ஆசை

இரவும் நீள

உடலும் களைப்பாக

கண்களும் அயர

உறக்கம் தழுவ

அயர்ந்தேன் மறந்தே

பொழுதும் விடிந்தது  

கனவும் கலைந்தது   

வயிறும் காய்ந்தே

பசியும் வந்தது

கனவு மூட்டையை

பரணில் எரிந்தே

குடும்ப சுமையை

முதுகில் சுமந்தே

சட்டியை எடுத்தேன்

கூலிக்கு விரைந்தேன்

இன்றைய வேலையாக

பள்ளிக்கு சென்றேன்

கட்டிட வேலைக்கு

கனவுகளை மண்ணாக்கி

கண்ணீரை செங்கல்லாக்கி

பூசிமொழுகினேன் என்னுள்

புதைந்த ஆசைகளை…

குழந்தை தொழிலாளர்களை வேலைக்கு அமர்த்த மாட்டோம் என்று உறுதி செய்வோம். குழந்தைகள் மூலம் கிடைக்கும் வருமானம் நாட்டிற்கும் வீட்டிற்கும் அவமானம்.  

அன்புடன்
ஆயிஷாபாரூக்